Blogue de Georges

I gn a ene cwinzinne d’ anêyes, dj’ a stî a on concert rok. A on moumint, li muzike est distindowe a cåze d’ ene aroke, on n’ ôt pus k’ les tchanteus. Tot l’ monde si rinde conte ki les muzicants n’ avént nén djouwé d’ leus guitares, mins k’ il avént tchanté avou ene erî-binde (playback). Les djins ont leyî djus l’ concert et rintrer al måjhone. Djustumint, li rok ni poleut nén esse fwait avou del erî-binde.

Al Urovuzion ons a decidé k’ a conter d’ asteure, i gn årè pus d’ vraiys muzicants sol sinne, såf li tchanteu(se). Ça cmincive a flairer…

Fwait a fwait, po conter li dierene dijhene d’ anêyes, i gn a avou sacwantès kitchreyes. Metans, Hard Rock Hallelujah di Mr Lordi, e 2006, a stî ene caricateure et do fel rok, et del muzike crustinne. I m’ shonnéve ki les wangnants wangnént djusse pask’ i gn aveut nolu d’ ôte di meyeu. Dji pinséve ki les vraiys muzicants n’ s’ avént måy prezinté po-z esse tchoezîs.

Po l’ Urovuzion d’ 2011, dji m’ a dit k’ efén nos avéns ene sakî d’ bén: Amaury Vassili. Et djustumint, c’ est d’ ça ki dj’ vis vou cåzer. Li råpén aveut studî les teyoreyes, et cnoxhe pår li vraiy tchantaedje. I tchantéve del pwetrene, nén del goidje come les apurdisses. Et co: i tchantéve e corsikin! Po ene sakî k’ a ses tayons d’ ôte pårt, tchanter èn on ptit lingaedje, i l’ faleut fé! Divins l’ timp, ene rîle del Urovuzion, c’ esteut d’ tchanter èn on lingaedje oficir do payis k’ on rprezinte. D’ on costé, ça spotchive les ptits lingaedjes, mins d’ èn ôte, ça espaitchive l’ inglès. Asteure ki tchaeke est libe, li pus grande et pezante pårteye des muzicant(e)s tchantnut èn inglès. Mins ç’ n’ est nén po ça k’ les tchansons sont meyeuzes. Gn a djusse ene volté d’ passer l’ wele si spotchî tos les lingaedjes, po mete l’ inglès al oneur. Di totes les manires, kî schoûte les paroles? Metans, e 2005, li Moldaveye a stî rprizentêye pa Zdob şi Zdub, ene binde k’ acmaxhe hådcore et muzike payizane, et k’ est fameuze d’ esse bilingue, si tchanter e roumin et russe. Po l’ Urovuzion 2005, il ont trové minme ene veye hiedresse po tchanter avou zels. Mins il ont alaidî l’ tchanson et l’ rimete en inglès.

E 1998, Charone Cohen – sipotêye Dana International – a avou l’ pris tot tchantant en ebreu. E 2007, Marija Šerifović, di Serbeye, wangna tot tchantant e s’ lingaedje. En on ptit lingaedje, nouk n’ aveut rén avou. Portant, li France aveut ddja avou stî rprezintêye: e 1992, Kali aveut yeu tchanté e creyole, ey e 1996, Dan Ar Braz et ses djins avént yeu tchanté Diwanit bugale e burton. E 1993, Patrick Fiori a tchanté Mama Corsica, ki seulmint l’ tite esteut e corsikin, eyet l’ resse e francès. Di pus, ons åreut plou dire ki tos les cias do passé: burtons, mårtinikès et corsikins, tertos, il avént må tchanté. L’ Urovuzion 2011 a stî l’ moumint po l’ France si racrester po dire k’ on pout bén tchanter en on ptit lingaedje et tolminme fé d’ adrame del foirt boune muzike.

Mins l’ Urovuzion n’ est pus ene bate di muzike, sapinse mi, ndo! Dispoy sacwantès anêyes, et po rhazî l’ clå e 2011, c’ est on concours di grossès pwetrenes, adon ki l’ pôve Amaury Vassili aveut djusse ene schoviete di såpire (une serpillière) so s’ tiesse. Asteure dji n’ a pus d’ dotance: l’ Urovuzion est ene mascaeråde ki costêye bråmint des cwårs. Çou sreut bén k’ i gn ouxhe sacwantès privêyès tchinnes di tévé ki metnuxhe so pîs ene ôte bate di muzike po tote l’ Urope, minme sins l’ peclêye di djins al sinne. Ça freut moens di betsåles et del vraiye muzike.

– – –

Vo-vs-la, mi manire da mene come i m’ ont ahåyî:

1. Amaury Vassili (France), Sognu.
2. Sigurjón’s Friends (Islande), Coming Home.
3. Loucas Djorcas & Stereo Mike (Graice), Watch My Dance.
4. Zdob şi Zdub (Moldaveye), So Lucky.
5. Ell & Nikki (Azeurbaydjan), Running Scared.
6. Lucía Pérez (Sipagne), Que me quiten lo bailao.